એક બાજુ શેરમાર્કેટમાં મોટી ઉથલપાથલ જોવા મળી રહી છે તો બીજી બાજુ સોના ચાંદીના ભાવ આસમાને પહોંચી રહ્યા છે. દિવસેને દિવસે મોંઘવારીનો માર લોકોને સતાવી રહ્યો છે. ત્યારે સોનાએ ફરી તમામ રેકોર્ડ તોડીને તેના ઐતિહાસિક સ્તરે પહોચી ગયું છે. સોનાના ભાવમાં વધારા માટે ડોનાલ્ડ ટ્રમ્પને જવાબદાર ઠેરવવામાં આવી રહ્યા છે. નિષ્ણાતો કહે છે કે, ટ્રમ્પ શાસનમાં શેરબજારના વળતર અંગે અનિશ્ચિતતા વધી છે. આવી સ્થિતિમાં, રોકાણકારો સોનામાં વધુ પૈસા રોકી રહ્યા છે.
આજે 24 કેરેટ સોનાના 10 ગ્રામનો ભાવ 82,090 રૂપિયા પર પહોંચી ગયો છે. ગયા બુધવારે સોનાનો ભાવ 80,000 રૂપિયા પ્રતિ 10 ગ્રામનો આંકડો પાર કરી ગયો હતો અને આજે પણ તેમાં વધારો જોવા મળી રહ્યો છે. છેલ્લા કેટલાક દિવસોથી સોનાના ભાવમાં સતત વધારો થઈ રહ્યો છે. ઇન્ડિયન બુલિયન જ્વેલર્સ એસોસિએશનના જણાવ્યા અનુસાર, વિશ્વભરમાં સોનાની માંગ અને વધતા ભાવને કારણે ભારતમાં પણ સોનાના ભાવમાં વધારો થયો છે. જોકે લંડન ઓટીસી સ્પોટ માર્કેટ અને કોમેક્સ ગોલ્ડ ફ્યુચર્સ માર્કેટ સહિત મુખ્ય વૈશ્વિક બજારોમાં ટ્રેડિંગ પ્રવૃત્તિ દ્વારા પણ સોનાના ભાવ મોટાભાગે પ્રભાવિત થાય છે. આ સાથે ડોલર ઇન્ડેક્સમાં ઘટાડાથી સોનાના ભાવ મજબૂત થયા છે.
ઘરેણાંના વેચાણ પર કેવી અસર થશે ?
નિષ્ણાતો કહે છે કે, સોનું શ્રેષ્ઠ રોકાણ વિકલ્પોમાંથી એક છે, તેથી ડોલર ઇન્ડેક્સમાં નબળાઈ અને શેરબજાર અંગે વધતી અનિશ્ચિતતાએ રોકાણકારોને સોનામાં વધુ રોકાણ કરવા પ્રેરણા આપી છે. જોકે, સોનાના ભાવ રેકોર્ડ ઊંચા સ્તરે પહોંચી રહ્યા હોવાથી લગ્નની સિઝન દરમિયાન છૂટક ઘરેણાંના વેચાણ પર અસર થવાની ધારણા છે.