અમેરિકાના ભૂતપૂર્વ રાષ્ટ્રપતિ જીમી કાર્ટરનું 29 ડિસેમ્બરને રવિવારે નિધન થયું છે. જીમી કાર્ટરે 100 વર્ષની વયે અંતિમ શ્વાસ લીધા. તેઓ અમેરિકાના 39મા રાષ્ટ્રપતિ હતા. કાર્ટર 1977માં આર. ફોર્ડને હરાવીને રાષ્ટ્રપતિ બન્યા હતા. તેઓ ડેમોક્રેટિક પાર્ટી તરફથી પ્રમુખ તરીકે ચૂંટાયા હતા. તેઓ અમેરિકાના ઈતિહાસમાં સૌથી લાંબુ જીવનાર રાષ્ટ્રપતિ રહ્યા.
નોબેલ શાંતિ પુરસ્કારથી સન્માનિત કરાયા હતા
તેઓ 1977 થી 1981 સુધી અમેરિકાના રાષ્ટ્રપતિ રહ્યા હતા. જીમી કાર્ટર લાંબા સમયથી મેલાનોમાથી પીડિત હતા. આ એક પ્રકારનું સ્કીન કેન્સર છે. જે તેમના લીવર અને મગજમાં ફેલાઈ ગયું હતું. તેમને 2002માં નોબેલ શાંતિ પુરસ્કાર પણ એનાયત કરવામાં આવ્યો હતો. આ સમય દરમિયાન, તેમણે અમેરિકાના મધ્ય પૂર્વ સંબંધોનો પાયો નાખ્યો.
જ્યોર્જિયામાં લીધા અંતિમ શ્વાસ
કાર્ટરનો જન્મ 1 ઓક્ટોબર, 1924ના રોજ થયો હતો. કાર્ટર 1971 થી 1975 સુધી તે જ્યોર્જિયાના ગવર્નર પદે રહ્યા હતા. તે જ્યોર્જિયાના પ્લેન્સના નાના શહેરમાં મૃત્યુ પામ્યા. તેમણે પોતાના ઘરે અંતિમ શ્વાસ લીધા. નવેમ્બર 2023માં તેમની પત્ની રોઝલિનનું પણ આ જ ઘરમાં નિધન થયું હતું. તેઓ એક વેપારી, નૌકા અધિકારી, રાજકારણી, વાટાઘાટકાર, લેખક પણ રહી ચૂક્યા હતા. એટલું જ નહીં, તે સુથારનું કામ સારી રીતે જાણતા હતા.
