ક્રિકેટ એ દુનિયાભરમાં ખુબ જ લોકપ્રિય છે અને જ્યારથી ટી 20 શરૂ થઇ છે ત્યારથી ક્રિકેટ રસિયાઓનો ઉત્સાહ પણ બમણો થઇ ગયો છે. ક્રિકેટ મેચ ઉપર ઘણા લોકો સટ્ટો પણ રમતા હોય છે અને પોલીસ આવા સટોડિયાઓને ઝડપી પણ લેતી હોય છે, પરંતુ થોડા દિવસ પહેલા જ મહેસાણામાં એક એવો સટ્ટો સામે આવ્યો જેને લોકોમાં પણ ચર્ચાનો વિષય બનાવી દીધો.
મહેસાણાના વડનગર તાલુકાના મોલિપુર ગામમાં ક્રિકેટ સટ્ટો રમાડવા માટે ખેતરમાં મેદાન બનાવાયું..અને તેનું લાઈવ ટેલિકાસ્ટ કરી રશિયામાં બેઠેલા સટ્ટોડિયાની મદદથી મેચ ફિક્સ કરી સટ્ટો રમવામાં આવતો. મહેસાણા SOG પોલીસને ખેતરમાં સટ્ટો રમવા માટે બનાવેલા મેદાનની જાણ થઈ ત્યારે રેડ કરી 4 જેટલા શખ્સને ઝડપી લીધા હતા.
ત્યારે હવે મહેસાણા જેવો જ એક મામલો યુપીમાંથી સામે આવ્યો છે. યુપીના હાપુડમાં એક નકલી ટી20 લીગનો પર્દાફાશ થયો છે, જેનું નામ છે “બિગ બોસ ટી20 પંજાબ લીગ” જેમાં સ્થાનિક ખેલાડીઓને રણજી ખેલાડીઓ તરીકે રજૂ કરવામાં આવ્યા હતા. તે ખેલાડીઓને રમવા અને શરત લગાવવા માટે કેટલાક પૈસા મળતા હતા, જેનું કનેક્શન સીધું રશિયા સાથે હતું.
જેમે જેમ આઇપીએલનો રોમાંચ વધવા લાગ્યો તેમે તેમે સટ્ટોડિયાઓ પણ વધવા લાગ્યા પરંતુ અહીં બુકીઓએ સટ્ટાબાજી માટે ટી-20 ક્રિકેટની નકલી લીગ તૈયાર કરી છે, જેનો માસ્ટરમાઇન્ડ રશિયામાં બેઠો હતો. હાપુડમાં યોજાનારી T20 લીગનું YouTube પર જીવંત પ્રસારણ કરવામાં આવ્યું હતું. જ્યારે Cric Heroes એપ દ્વારા તેમના પર સટ્ટાબાજી કરવામાં આવી હતી.
હવે તમે વિચારતા જ હશો કે ક્રિકેટના નામે ચાલી રહેલી આ છેતરપિંડીનો પર્દાફાશ કેવી રીતે થયો? તેથી તેનો પર્દાફાશ ત્યારે થયો જ્યારે પોલીસે દરોડો પાડ્યો અને મેરઠ બાયપાસ પર સ્થિત એક મેદાનમાંથી બે બુકીઓની ધરપકડ કરી, જ્યાં મેચ રમવાની હતી. પોલીસ દ્વારા પકડાયેલા લોકો પાસેથી મોબાઈલ, લેપટોપ સહિત ઘણા ટેકનિકલ ઉપકરણો મળી આવ્યા હતા. આ ઉપરાંત તેની પાસેથી રૂ. 15150 ઉપરાંત રૂ. 7800નું શ્રીલંકન ચલણ પણ મળી આવ્યું હતું.
પકડાયેલા બંને બુકીઓ નકલી મેચના આયોજન માટે મેદાન પસંદ કરતા હતા. આ સિવાય તે ક્રિક હીરોઝ નામની એપ પર તેમાં રમતા ખેલાડીઓની વિગતો અપલોડ કરતો હતો, જેઓ સ્થાનિક ખેલાડી હતા પરંતુ તેમની ઓળખ રણજી ખેલાડી તરીકે જણાવવામાં આવતી હતી. હાપુરના એસપી દીપક ભુકરે જણાવ્યું કે ધરપકડ કરાયેલા બંને લોકોને માહિતી આપવામાં આવી હતી અને કહેવામાં આવ્યું હતું કે તેઓ નકલી મેચોનું આયોજન કરતા હતા અને ટેકનિકલ સાધનો દ્વારા તેનું લાઇવ સ્ટ્રીમિંગ કરતા હતા. તપાસ બાદ જાણવા મળ્યું કે આ રેકેટનો “માસ્ટર માઈન્ડ” અશોક ચૌધરી હતો, જે રશિયાથી લીગ ચલાવતા આસિફ મુહમ્મદના સંપર્કમાં હતો.
