ગણેશ મહોત્સવ આખા દેશમાં ચાલી રહ્યો છે અને ઠેર ઠેર ગણપતિના પંડાલો પણ શણગારવામાં આવ્યા છે. જેમાં લાખો ભક્તો બાપ્પાના દર્શન કરવાનો લ્હાવો લઇ રહ્યા છે, તો બીજી તરફ ઘણા લોકો એવા પણ હોય છે જે આસ્થાના નામ ઉપર લોકોને લૂંટતા પણ હોય છે, ત્યારે હાલ આવો જ એક કિસ્સો સામે આવ્યો છે, જેમાં એક વ્યક્તિએ ઓનલાઇન મૂર્તિ મંગાવી અને જમીનમાં દબાવી દીધી, પછી તેને બહાર કાઢીને 500 વર્ષ જૂની કહીને લોકોને આસ્થાના નામ ઉપર છેતર્યા હતા.
આ મામલો સામે આવ્યો છે ઉત્તર પ્રદેશના ઉન્નાવ જિલ્લામાંથી.જ્યાં એક પિતા-પુત્રોએ દેવી-દેવતાઓની મૂર્તિઓ ઓનલાઈન મંગાવી અને ચુપચાપ ખેતરમાં દફનાવી દીધી. થોડા સમય પછી બંનેએ ખેતર ખોદવાનું શરૂ કર્યું. બંનેએ દાટેલી મૂર્તિઓને ખેતરમાંથી બહાર કાઢી અને લોકોમાં એવી અફવા ફેલાવી કે આ મૂર્તિઓ 500 વર્ષ જૂની છે. આ પછી ગામમાં તે મૂર્તિઓના દર્શન અને અર્પણ માટે મેળો ભરાયો હતો.
મહમૂદપુર ગામના રહેવાસી અશોક કુમારે મંગળવારે પોતાના ખેતરમાં ખોદકામ શરૂ કર્યું. આ દરમિયાન તેઓએ ધાર્મિક મૂર્તિઓ સાથે બહાર આવ્યા હોવાનો દાવો કર્યો હતો. આ દાવો સાંભળીને આસપાસના ગ્રામજનો પણ ત્યાં પહોંચી ગયા હતા. દિવસભર સેંકડો ભક્તો ત્યાં પહોંચ્યા હતા અને પ્રાર્થના અને પ્રસાદ અર્પણ કર્યો હતો. બીજી તરફ ખેતરમાંથી હિંદુ દેવી-દેવતાઓની પીળી ધાતુની મૂર્તિઓ બહાર આવવાના સમાચાર સાંભળીને એસડીએમ અને આસિવાન પોલીસ સ્ટેશનના ઈન્ચાર્જ પણ ઘટનાસ્થળે પહોંચી ગયા હતા.
આ બાબતની જાણ પુરાતત્વ વિભાગને કરવામાં આવી હતી અને મૂર્તિઓને અશોકના ઘરમાં રાખવામાં આવી હતી. અધિકારીઓ સ્થળ પરથી જતાની સાથે જ અશોકનો પુત્ર રવિ ગૌતમ, વિજય ગૌતમ ખેતરમાં ખોદેલા ખાડા પાસે તે મૂર્તિઓને લઈને લાલ કપડા પર બેસી ગયા. આ દરમિયાન પિતા અને બંને પુત્રોએ પણ થેલીમાંથી પ્રસાદ વહેંચવાનું શરૂ કર્યું હતું. લોકો ત્યાં પ્રસાદ બનાવવા લાગ્યા અને પ્રસાદનું વિતરણ ચાલુ રહ્યું.
મામલાની માહિતી મળતાં પોલીસ ઘટનાસ્થળે પહોંચી હતી પરંતુ ભીડને જોઈને તે પણ શાંત થઈ ગઈ હતી. દરમિયાન શાંતિ જાળવવા માટે બે પોલીસકર્મીઓને ત્યાં તૈનાત કરવામાં આવ્યા હતા. લોકો પોલીસની સામે મૂર્તિઓને પ્રસાદ ચડાવતા રહ્યા. દરમિયાન અશોક અને તેમના પુત્ર દ્વારા નજીકમાં રાખેલ પ્રસાદનું વિતરણ કરવામાં આવ્યું હતું.
આ દરમિયાન મૂર્તિની ડિલિવરી કરનાર ગોરેલાલે સોશિયલ મીડિયા પર ફોટો જોઈને મૂર્તિ અને પિતા-પુત્રને ઓળખ્યા. તે સીધો આશિવાન પોલીસ સ્ટેશન ગયો અને પોલીસને સમગ્ર હકીકત જણાવી. તેમણે જણાવ્યું કે રવિ ગૌતમની મૂર્તિઓનો આ સેટ meesho કંપની પાસેથી 169 રૂપિયામાં મંગાવ્યો હતો. 29 ઓગસ્ટના રોજ સેટની ડિલિવરી કરવામાં આવી હતી. તેણે તેને લગતી રસીદ પણ શેર કરી. આ પછી પોલીસે પિતા-પુત્રોની ધરપકડ કરી હતી.
