દાણચોરીના ઘણા બધા મામલા છેલ્લા ઘણા સમયથી સામે આવી રહ્યા છે, વિદેશથી આવતા ઘણા લોકો એરપોર્ટ ઉપર ઝડપાય છે જે પોતાની સાથે વિદેશી સામાન, સોનુ અને રોકડ જેવી રકમો ખુબ જ ચાલાકીથી લઈને આવતા હોય છે. જ્યારે તેમને એરપોર્ટ ઉપર ઝડપવામાં આવે છે ત્યારે અધિકારીઓના પણ હોશ ઉડી જતા હોય છે, હાલ એવો જ એક મામલો દિલ્હી એરપોર્ટ પરથી ચર્ચામા આવ્યો છે.
કસ્ટમ અધિકારીઓ દ્વારા દિલ્હી એરપોર્ટ પર સાત વૈભવી કાંડા ઘડિયાળોની દાણચોરી કરવા બદલ એક વ્યક્તિની ધરપકડ કરવામાં આવી છે. અધિકારીઓએ ગુરુવારે જણાવ્યું હતું કે તેની પાસેથી મળી આવેલી ઘડિયાળમાંથી એક હીરા જડેલી સોનાની છે અને તેની કિંમત 27.09 કરોડ રૂપિયા છે.
ઈન્દિરા ગાંધી ઈન્ટરનેશનલ (IGI) એરપોર્ટના કસ્ટમ્સ કમિશનર ઝુબેર રિયાઝ કામલીએ જણાવ્યું હતું કે મૂલ્યની દૃષ્ટિએ કોમર્શિયલ અથવા લક્ઝરી સામાનની આ સૌથી મોટી જપ્તી છે. “મૂલ્યની દ્રષ્ટિએ તે એક જ વારમાં 60 કિલો સોનું જપ્ત કરવા સમાન છે,” એવું તેમણે કહ્યું. એક સત્તાવાર નિવેદનમાં કહેવામાં આવ્યું છે કે આરોપી મુસાફર જે મંગળવારે દુબઈથી અહીં પહોંચ્યો હતો, તેને કસ્ટમ અધિકારીઓએ રોક્યો હતો.
આરોપી ભારતીય નાગરિક છે. નિવેદનમાં જણાવાયું છે કે વિગતવાર તપાસ અને તેના સામાનની વ્યક્તિગત શોધ દરમિયાન સાત કાંડા ઘડિયાળો મળી આવી હતી. આ ઘડિયાળો- જેકબ એન્ડ કંપની (મોડલ: BL115.30A), પિગેટ લાઈમલાઈટ સ્ટેલા (SI.No.1250352 P11179), રોલેક્સ ઓયસ્ટર પર્પેચ્યુઅલ ડેટ જસ્ટ (SI.No.Z7J12418), Rolex Oyster Perpetual Date Just (SI.No. 0C4G2) 17), રોલેક્સ ઓયસ્ટર પર્પેચ્યુઅલ ડેટ જસ્ટ (SI. No. 237Q 5385) અને રોલેક્સ ઓયસ્ટર પર્પેચ્યુઅલ ડેટ જસ્ટ (SI. No. 86 1R9269) છે.
કહેવામાં આવ્યું હતું કે જેકબ એન્ડ કંપનીની એક ઘડિયાળની કિંમત 27.09 કરોડ રૂપિયા છે. આ ઘડિયાળો ઉપરાંત, પેસેન્જર પાસેથી 28.17 કરોડની કિંમતનું હીરા જડિત સોનાનું બ્રેસલેટ અને આઈફોન 14 પ્રો 256 જીબી પણ મળી આવી છે. જે દિલ્હી કસ્ટમ્સ દ્વારા જારી કરાયેલા નિવેદનમાં જણાવાયું છે. વોચ જપ્ત કરવામાં આવી છે અને મુસાફરની ધરપકડ કરવામાં આવી છે.
કસ્ટમના એક વરિષ્ઠ અધિકારીએ જણાવ્યું કે આરોપી પ્રવાસી અને તેના કાકાનો દુબઈમાં મોંઘી ઘડિયાળોનો શોરૂમ છે, જેની સંયુક્ત આરબ અમીરાત (યુએઈ)માં અન્ય સ્થળોએ શાખાઓ છે.
નામ જાહેર ન કરવાની ઈચ્છા વ્યક્ત કરતાં અધિકારીએ કહ્યું, “તે તેમને એક હાઈ-પ્રોફાઈલ ક્લાયન્ટ સુધી પહોંચાડવા માટે તેને દિલ્હી લઈ જતો હતો. પ્રવાસી આ ગ્રાહકને દિલ્હીની એક ફાઈવ સ્ટાર હોટલમાં મળવાનો હતો, જે ગુજરાતનો હોવાનું કહેવાય છે. જોકે ગ્રાહક તેને મળવા પહોંચ્યો ન હતો. હજુ સુધી આરોપીએ ગ્રાહકનું નામ જાહેર કર્યું નથી કે તેને પોતાના જીવનો ડર છે.
