આજે મોટાભાગના લોકોના હાથમાં સ્માર્ટફોન જોવા મળે છે અને સ્માર્ટફોનથી લોકો સોશિયલ મીડિયા જ ચલાવે છે ત્યારે આ સોશિયલ મીડિયામાં આજના યુવાનોને ફેન ફોલોઇંગ વધારવાનું પણ ઘેલું લાગ્યું છે અને તે કરવા માટે તેઓ કોઈપણ હદ સુધી જતા પણ જોવા મળે છે. આવા મામલામાં ઘણીવાર કોઈની હત્યા પણ થઇ જતી હોય છે, ત્યારે હાલ એવો જ એક મામલો સામે આવ્યો છે, જેમાં એક કોમેન્ટને લઈને બે લોકોની હત્યા થઇ ગઈ.
આ મામલો સામે આવ્યો છે દિલ્હીના બહારના વિસ્તારમાંથી. જ્યાં બુધવારે રાત્રે ભાલવા ડેરી વિસ્તારના મુકંદપુર પાર્ટ-2માં એક 17 વર્ષીય યુવતી, તેના સગીર ભાઈ અને તેના મિત્રો સાથે મળીને એક યુવક અને તેના સગીર મિત્રએ ઈન્સ્ટાગ્રામ પર કોમેન્ટ કર્યા બાદ છરી વડે હુમલો કર્યો હતો. બંને ઇજાગ્રસ્તોને નજીકની હોસ્પિટલમાં દાખલ કરવામાં આવ્યા હતા, જ્યાં સારવાર દરમિયાન બંનેએ દમ તોડી દીધો હતો.
તપાસમાં જાણવા મળ્યું કે સગીર યુવતીએ કિશોર અને યુવકને મળવા બોલાવ્યા હતા. જ્યાં બોલાચાલી થતાં યુવકે યુવતીને થપ્પડ મારી હતી. આનાથી નારાજ યુવતીએ તેના ભાઈ અને તેના મિત્રોને હુમલો કરવાનું કહ્યું. આ પછી યુવતીના સગીર ભાઈ અને તેના મિત્રોએ તેના પર ચાકુ વડે હુમલો કર્યો હતો. પોલીસે હત્યાનો ગુનો નોંધી યુવતી સહિત ચાર આરોપીઓની ધરપકડ કરી છે.
પોલીસ અધિકારીઓના જણાવ્યા અનુસાર, મૃતકોની ઓળખ મુકુંદપુર ભાગ 2ના રહેવાસી 17 વર્ષીય સાહિલ અને ગાઝિયાબાદના રહેવાસી 28 વર્ષીય નિખિલ તરીકે થઈ છે. સાહિલ આઝાદપુર મંડીમાં લોડરનું કામ કરતો હતો, જ્યારે નિખિલ ટેમ્પો ચલાવતો હતો. બુધવારે રાત્રે સાહિલના ઘર પાસે રહેતી યુવતીએ તેને મળવા બોલાવ્યો હતો. સાહિલ તેના મિત્ર નિખિલ સાથે મુકુંદપુર ભાગ II પહોંચ્યો. યુવતીએ નિખિલને તેના ઈન્સ્ટાગ્રામ પર કરેલી કોમેન્ટ માટે તેની સાથે દુર્વ્યવહાર કર્યો હતો.
જેના પર નિખિલે યુવતીને થપ્પડ મારી હતી. યુવતીને થપ્પડ મારતાની સાથે જ ત્યાં હાજર યુવતીના ભાઈ અને તેના બે સગીર મિત્રોએ સાહિલ અને નિખિલને માર મારવાનું શરૂ કરી દીધું હતું. પ્રતિકાર કરવા પર હુમલાખોરોએ તેના પર છરી વડે હુમલો કર્યો હતો. તપાસ બાદ પોલીસ અધિકારીઓએ જણાવ્યું કે યુવતીને ઈન્સ્ટાગ્રામ પર રીલ બનાવવાનો શોખ છે. સાહિલ અને તેના મિત્રો તેની રીલ પર કોમેન્ટ કરતા હતા. જેના પાર કોમેન્ટને લઈને તેમની વચ્ચે સતત બોલાચાલી થતી હતી.
તપાસમાં જાણવા મળ્યું કે આરોપી યુવતી મુકુંદપુરમાં રહે છે. તેના પિતા મજૂર તરીકે કામ કરે છે જ્યારે તેની માતા બીમાર છે. છોકરી ઇન્સ્ટાગ્રામ પર રીલ બનાવીને સગીર છોકરાઓ સાથે મિત્રતા કરે છે. પોલીસ સૂત્રોનું કહેવું છે કે સાહિલનું ઘર યુવતીના ઘરથી પાંચસો મીટર દૂર છે. તપાસમાં જાણવા મળ્યું કે સાહિલ અને તેનો મિત્ર નિખિલ તેમના વિસ્તારની યુવતી દ્વારા બનાવેલી રીલ પર ટિપ્પણી કરતા હતા. જેના કારણે યુવતી ખૂબ જ ગુસ્સામાં હતી.
