આજે જમાનો એકદમ બદલાઈ ગયો હોવાના ઘણા પુરાવા આપણે જોઈ શકીએ છીએ એમાં જ એક છે ગામ કે શહેરમાં ટાવર ઉપર બનાવેલા ઘડિયાળની બંધ હાલત, ઘણી જગ્યાએ તો એ ટાવરો પણ હવે નથી રહ્યા અને જ્યાં રહ્યા છે ત્યાં ઘડિયાળ બંધ થઇ એની ધૂળ ખાતી પડી હશે.
આજે મોટાભાગના લોકો હાથમાં ઘડિયાળ પહેરે છે, સામાન્ય નહિ પણ હવે તો લોકો સ્માર્ટ વોચ પહેરતા થઈ ગયા છે, ખિસ્સામાં રહેલો મોબાઈલ પણ સમય બતાવે છે, પરંતુ આ બધામાં સમય બતાવતો હોવા છતાં પણ માણસ પાસે આજે સમય તો નથી જ એમ કહેવામાં આવે તો કઈ ખોટું તો નથી જ.
વાત કરીએ આજથી થોડા પાછળ એટલે કે 30 થી 60 વર્ષ પહેલાના જીવનની તો એ સમયે ઘડિયાળ તો હતા જ નહીં ત્યારે લોકો દિવસે માથે તપતા સૂરજ અને રાત્રે આભના તારા ગણી અને સમય નક્કી કરી લેતા હતા, વળી ઘણી જગ્યાએ સવારે વહેલા ઉઠવા માટે ઘણા ગામોમાં દૂધ મંડળીમાં એક સાયરન વગાડવામાં આવતું જેથી મહિલાઓ ગાયો ભેંસો દોહવાનો સમય નક્કી કરી શકતી હતી, ગામમાં આવતી એસ.ટી. બસ દ્વારા પણ ઘણા લોકો સમયનો તાળો મેળવી લેતા હતા.
ખેતરમાં કામ કરવા આવેલા મજૂરો પણ 12 વાગ્યાની બસ ગામમાં આવે એટલે સમજી જતા કે હવે વેળા પુરી થઈ છે, ત્યારે તો ઘડિયાળ હતા પરંતુ બધા લોકો સુધી ઘડિયાળ પહોંચ્યા પણ નહોતા. બસ કે ટ્રેનના આવવાનો કે જવાનો સમય હોય, મંદિરમાં થતી આરતીનો સમય હોય, કે દૂધ મંડળીમાં વાગતા સાયરાનના અવાજ દ્વારા કે પછી સૂરજ અને ચંદ્રની દિશા દ્વારા જ સમય નક્કી થતો હતો.
સવારમાં ધ્રુવનો તારો પણ એક સમય સૂચક હતો, સવારે ખેડૂતો અને મહિલાઓ ધ્રુવના તારા દ્વારા જ સવાર પડી હોવાનું નક્કી પણ કરતા હતા, પરંતુ આજે આ બધું જોવા નથી મળતું, આજે તો મોબાઈલમાં રહેલું એલાર્મ જ સમય બતાવી જાય છે.
ઘણી જગ્યાએ પછી ટાવર ઉપર ઘડિયાળ પણ લાગેલા હતા અને એના દ્વારા પણ સમય નક્કી થતો ગયો, એ સમયે શિક્ષણનું સ્તર પણ ઘણું જ નીચું હતું જેના કારણે લોકોને ટાવરમાં પણ સમય જોતા નહોતું આવડતું પરંતુ ટાવરમાં પડતા મોટા અવાજ વાળા ટકોરા ગણી અને સમય નક્કી કરી લેતા હતા.
આજે આ બધું નામશેષ થતું ગયું છે, આજની નવી પેઢી માટે આ બધી બાબતોનો કોઈ મતલબ નથી, બસ તેમના માટે તો આ એક માહિતી જ છે પરંતુ જે લોકો આ સમયને પસાર કરીને આવ્યા છે તેમના માટે તો આ એક યાદોના સંભારણા સમાન છે, તેમના માટે તો આજે પણ એ સમય પાછો આવે તો એમને જીવવાનું ગમે.
જો તમારા જીવનમાં પણ તમે આ સમયને જોયો હોય, અનુભવ્યો હોય તો કોમેન્ટમાં તમારા અનુભવને પણ જરૂર જણાવજો, જેથી અમને પણ નવી માહિતી મળી શકે અને આવા જ વિષયો તમારી સામે લાવતા રહીએ.
Author: નીરવ પટેલ “શ્યામ” GujjuRocks Team
આવી જ રીતે રોજિંદા જીવનમાં ઉપયોગી હોય એવી લાગણીસભર વાર્તાઓ, સ્વાસ્થ્યવર્ધક માહિતી, બોલીવુડની ખબરો, ધાર્મિક વાતો, રેસિપી તથા અન્ય રસપ્રદ માહિતીઓ મેળવવા માટે ગુજરાતીઓનું લોકલાડીલું પેજ GujjuRocks લાઈક કરી જોડાઓ.