સુરત ઈન્ટરનેશનલ એરપોર્ટ પર એક ચોંકાવનારી ઘટના બની છે. સુરત એરપોર્ટ પર CISF સેલના જવાન કિશનસિંહે ગોળી મારી આપઘાત કરી લેતાં ચકચાર મચી છે. એરપોર્ટના બાથરૂમમાં જઇ પોતાની બંદૂક વડે CISF જવાને પોતાના પેટના ભાગે ગોળી મારી જીવન ટૂંકાવ્યું છે. વર્ષ 2022માં સુરત એરપોર્ટ પર ફરજ નિભાવી રહ્યા હતા.
મળતી માહિતી અનુસાર, સુરત ઈન્ટરનેશનલ એરપોર્ટ પર CISFમાં ફરજ બજાવતા જવાન કિશનસિંહે બાથરૂમમાં જઈ પોતાની સર્વિસ બંદૂકથી પેટના ભાગે ગોળી મારી આત્મહત્યા કરી લેતાં ચકચાર મચી છે. ગોળીના અવાજે બાકીના CISF જવાનો બાથરૂમ તરફ દોડ્યા હતા. પરંતુ બાથરૂમનો દરવાજો ખૂલ્યો નહોતો, જેના કારણે CISFના અન્ય જવાનો બાથરૂમના છત પરથી બાથરૂમમાં અંદર ઘૂસ્યા હતા. ત્યારે કિશન સિંહ જીવિત હતા, પરંતુ હોસ્પિટલમાં લઈ જાતા સમયે તેઓનું મોત થયું. આજે બપોરના સમયે CISF જવાન પોતાના સાથી કર્મચારી સાથે વાતચીત કરી રહ્યા હતા. તે સમયે સામાન્ય હતા. પરંતુ અચાનક તેઓ એરપોર્ટના બાથરૂમમાં ગયા અને પોતાની બંદૂકથી પોતાને ગોળી માર લીધી હતી.
મૃતક જવાનના એક વર્ષ પહેલા જ લગ્ન થયા હતા
કિશન સિંહને 2022માં સુરત ઇન્ટરનેશનલ એરપોર્ટ પર તૈનાત કરવામાં આવ્યા હતા. તેઓએ સુરક્ષાની જવાબદારી સંભાળી હતી. એક વર્ષ પહેલા જ તેમના લગ્ન થયા હતા. તે મૂળ રાજસ્થાનના જયપુરના વતની હતા.
