રાજ્યમાં દિવસેને દિવસે દુર્ઘટનાઓ વધારો થઈ રહ્યો છે. ત્યારે વડોદરા શહેરમાંથી વધુ એક દુર્ઘટનાના સમાચાર સામે આવ્યા છે. વડોદરા શહેરમાં મોટી દુર્ઘટના ટળી છે. શહેરના માંજલપુર વિસ્તારમાં રોયલ આનંદ મેળામાં મોટી દુર્ઘટના બનતા રહી ગઈ છે. જેમાં, બાળકોની હેલિકોપ્ટર રાઈડનો દરવાજો ખુલી ગયો હતો. જેના કારણે બાળકો ચાલુ રાઈડમાંથી નીચે પડ્યા હતા. આ ઘટનામાં ચાર બાળકોને સામાન્ય ઈજા થઈ હોવાની જાણકારી મળી છે. આ સમગ્ર બનાવ અંગે તંત્ર પણ દોડતું થયું હતું અને હાલ આ રાઈડ બંધ કરી દેવામાં આવી છે.
વડોદરાના માંજલપુરમાં ચાલી રહેલા રોયલ મેળામાં મોટી દુર્ઘટના થતા ટળી હતી. બાળકોની હેલિકોપ્ટર રાઈડમાં ચાલુમાં દરવાજો ખુલતા અફરા તફરીનો માહોલ સર્જાયો હતો. ક્રીસમસ સંધ્યાએ મેળામાં મોટી સંખ્યામાં લોકો હાજર હતા, ત્યારે આ ઘટના બની હતી. ત્યારબાદ ત્યાં હાજર સૌ કોઈએ બૂમરાડ કરીને તાત્કાલિક રાઈડ બંધ કરાવી દીધી હતી. આ ઘટનામાં ચાર બાળકોને સામાન્ય ઈજા થઈ હોવાની જાણકારી મળી છે. આ સમગ્ર બનાવને અંગે તંત્ર પણ દોડતું થયું હતું. સદનસીબે મોટી જાનહાની ટળી છે.
વડોદરા શહેરના માંજલપુરમાં હાલ રોયલ નામથી મેળો ચાલી રહ્યો છે. આ મેળામાં દરરોજ મોટી સંખ્યામાં લોકો પહોંચતા હોય છે. તેવામાં બુધવારે સાંજે આ મેળામાં નાના બાળકોની રાઈડમાં લોક ખુલી ગયું હતું. નાની હેલિકોપ્ટર વાળી રાઈડમાં બાળકો બેઠા હતા અને અચાનક આ રાઈડમાં એક હોલિકોપ્ટરનું લોકો ખુલી ગયું હતું. આ ઘટનાને પગલે દોડધામ મચી ગઈ હતી. ત્યારે હવે સવાલો ઉભા થઈ રહ્યા છે કે ટેમ્પરરી રાઇડ્સનું શું ફિટનેસ સર્ટિફિકેટ લીધું છે કે નહીં? જો કોઈ બાળક પડી જાત તો અને કઈ મોટી દુર્ઘટના બની હોય તો તેનું કોણ જવાબદાર હોત?
રોયલ મેળામાં આવેલા એક વ્યક્તિએ જણાવ્યું હતું કે, આ હેલિકોપ્ટર રાઇડમાં ઓવર સ્પીડિંગ થતા અમે ઓપરેટરને બૂમ મારી પણ, એ ભાગી ગયો હતો. છોકરાઓ બધા નીચે પડવા માંડ્યા હતા. એટલે અમે હેલિકોપ્ટર પકડીને પછી વાયર ખેંચી અને રાઈડ બંધ કરી હતી. જેમાં ત્રણથી ચાર વર્ષના બાળકો નીચે પડ્યા હતા. બધાને ઈજાઓ થઈ છે. તો આ સમગ્ર મામલે રોયલ મેળાના સંચાલક હેમરાજ મોરેએ જણાવ્યું હતું કે, બાળકો રાઈડમાં બેઠા હતા. કેટલાક બાળકો તોફાન કરતા દરવાજો ખુલી ગયો હતો. જ્યારે વાલીઓએ પણ હોબાળો કરતા ઓપરેટર ગભરાઈને ભાગી ગયો હતો. તમામ રાઈડનું મેન્ટેનન્સ કરવામાં આવે છે. આ ઘટના ઘટી તેનું અમને દુઃખ છે તમામ મુલાકાતીઓને રિફંડ કરી દેવાયું છે. સમગ્ર રાઈડનું લાઇસન્સ પણ અમે લીધેલું છે.
જ્યારે સમગ્ર બનાવને લઈને ઘટના સ્થળે આવી પહોંચેલા જોઈન્ટ પોલીસ કમિશનર લીના પાટીલે જણાવ્યું હતું કે, રોયલ મેળાના સુપરવાઇઝર અને ઓપરેટરની અટકાયત કરવામાં આવી છે. મેળામાં રાઈડ્સ માટેની જરૂરી પરવાનગી લેવામાં આવી છે કે નહીં તે દિશામાં પણ તપાસ થશે. મેળાની આડમાં જુગાર ધામ ચાલતું હોવાની પણ આશંકા છે તે દિશામાં પણ પોલીસ તપાસ હાથ ધરશે. હાલમાં મેળો સુરક્ષા કારણોસર બંધ કરાવ્યો છે.
