ગર્ભવતી મહિલા સાથે ગેંગરેપ, પરિવારના 7 ને મારી નાખ્યા… 11 દોષિત બળાત્કારીઓ 15 વર્ષમાં ગુજરાત સરકારે છોડી દીધા, કેસની પૂરી કહાની જાણશો તો મગજનો પિત્તો છટકી જશે
બિલ્કીસ બાનો ગેંગરેપ કેસમાં આજીવન કેદની સજા પામેલા તમામ 11 દોષિતોને મુક્ત કરવામાં આવ્યા છે. ગુજરાત સરકારે દોષિતોને મુક્ત કરવાનો નિર્ણય લીધો છે. આ તમામ દોષિતો 15 વર્ષથી વધુ સમયથી જેલમાં હતા. ગુજરાતના ગોધરામાં 2002ના રમખાણો બાદ બિલ્કીસ બાનો પર સામૂહિક બળાત્કાર થયો હતો. તેના પરિવારના 7 લોકોની પણ હત્યા કરવામાં આવી હતી. આ કેસમાં 2008માં 11 દોષિતોને આજીવન કેદની સજા ફટકારવામાં આવી હતી. આમાંથી એક દોષિતે મુક્તિ માટે સુપ્રીમ કોર્ટનો સંપર્ક કર્યો હતો. કોર્ટે જેલમુક્તિનો નિર્ણય ગુજરાત સરકાર પર છોડી દીધો હતો,
ત્યારે હવે ગુજરાત સરકારે જેલમુક્તિનો નિર્ણય લીધો છે અને આ નિર્ણયની ટીકા પણ થઈ રહી છે. 2004માં સીબીઆઈની વિશેષ અદાલતે આરોપીઓને આજીવન કેદની સજા ફટકારી હતી. 2002માં ગોધરાકાંડ બાદ ગુજરાતમાં થયેલા રમખાણો દરમિયાન લીમખેડા તાલુકામાં બિલ્કીસ બાનો પર સામૂહિક બળાત્કાર થયો હતો. આ દરમિયાન તેના પરિવારના 7 સભ્યોની પણ હત્યા કરવામાં આવી હતી. સુપ્રીમ કોર્ટના આદેશ પર સીબીઆઈએ કેસની તપાસ કરી અને 2004માં 11 આરોપીઓની ધરપકડ કરીને મુંબઈ લઈ જવામાં આવ્યા.
તમામને સીબીઆઈ કોર્ટે આજીવન કેદની સજા ફટકારી હતી. આરોપીઓને પહેલા મુંબઈની આર્થર રોડ જેલમાં અને પછી નાશિક જેલમાં રાખવામાં આવ્યા હતા. લગભગ 9 વર્ષ બાદ તમામને ગોધરાની સબ જેલમાં ટ્રાન્સફર કરવામાં આવ્યા હતા.આ કેસમાં જે દોષિતોને મુક્ત કરવામાં આવ્યા છે તેમાં જસવંતભાઈ નાઈ, ગોવિંદભાઈ નાઈ, શૈલેષ ભટ્ટ, રાધેશ્યામ શાહ, બિપિન ચંદ્ર જોષી, કેસરભાઈ વહોનિયા, પ્રદીપ મોરઢિયા, બકાભાઈ વહોનિયા, રાજુભાઈ સોની, મિતેશ ભટ્ટ અને રમેશ ચંદનાનો સમાવેશ થાય છે.
દોષિતોમાંના એક રાધેશ્યામ શાહે CrPCની કલમ 432 અને 433 હેઠળ સજા માફ કરવા માટે ગુજરાત હાઈકોર્ટનો સંપર્ક કર્યો હતો. ગુજરાત હાઈકોર્ટે તેમની અપીલ ફગાવી દીધી હતી કે મહારાષ્ટ્ર સરકાર આ અંગે નિર્ણય લઈ શકે છે. આ પછી સુપ્રીમ કોર્ટનો દરવાજો ખખડાવ્યો. આ વર્ષે 13 મેના રોજ સુપ્રીમ કોર્ટે તેના આદેશમાં કહ્યું હતું કે ગુજરાતમાં ગુનો આચરવામાં આવ્યો હોવાથી, ફક્ત ગુજરાત સરકાર જ તેને મુક્ત કરવાનો નિર્ણય લઈ શકે છે. સુપ્રીમ કોર્ટે બે મહિનામાં આ અંગે નિર્ણય લેવાનો આદેશ આપ્યો હતો. ત્યારે સુપ્રીમ કોર્ટના આદેશ બાદ ગુજરાત સરકારે તમામ 11 દોષિતોને મુક્ત કરવાનો નિર્ણય લીધો.
જેલમાંથી છૂટ્યા બાદ એક આરોપીએ કહ્યું- આજે અમે જેલમાંથી બહાર આવ્યા ત્યારે પરિવારમાં ખુશીનો માહોલ હતો. જેલમાં અમારા રોકાણ દરમિયાન અમે અસહ્ય વેદના અને અપમાન સહન કર્યું. અમે ઘણા મિત્રો અને સંબંધીઓને પણ ગુમાવ્યા. અમારી સાથે સજા ભોગવી રહેલા જશુકાકાના પત્નીનું કેન્સરથી અવસાન થયું. આ સિવાય અન્ય એક સાથી બિપીન ભાઈ જોશીને પગમાં ખૂબ જ ગંભીર સમસ્યા હોવાનું બહાર આવ્યું છે. સાથે જ તેની પત્ની પણ હાલમાં કેન્સર સામે ઝઝૂમી રહી છે.
આ સિવાય એક અન્ય સાથી પ્રદીપભાઈના પત્નીનું કિડની ફેલ થવાને કારણે મોત થયું.માનવાધિકાર વકીલ શમશાદ પઠાણે ન્યૂઝ એજન્સીને જણાવ્યું કે મોટી સંખ્યામાં દોષિતો હજુ પણ જેલમાં છે, જેમણે બિલ્કીસ કેસ કરતાં ઓછા જઘન્ય અપરાધો કર્યા છે. તેમણે કહ્યું કે જ્યારે સરકાર આવો નિર્ણય લે છે ત્યારે પીડિતા સિસ્ટમથી આશા ગુમાવે છે.27 ફેબ્રુઆરી 2002ના રોજ ગુજરાતના ગોધરા સ્ટેશન પર સાબરમતી એક્સપ્રેસના કોચને સળગાવી દેવામાં આવ્યો હતો. આ ટ્રેનમાંથી કારસેવકો પરત ફરી રહ્યા હતા. જેના કારણે કોચમાં બેઠેલા 59 કાર સેવકોના મોત થયા હતા.આ પછી તોફાનો ફાટી નીકળ્યા હતા.
રમખાણોથી બચવા માટે, બિલ્કીસ બાનોએ તેની પુત્રી અને પરિવાર સાથે ગામ છોડી દીધું હતું. 3 માર્ચ 2002ના રોજ 20-30 લોકોના ટોળાએ તલવારો અને લાકડીઓથી હુમલો કર્યો જ્યાં બિલકિસ બાનો અને તેનો પરિવાર છુપાયો હતો. ટોળાએ બિલ્કીસ બાનો પર બળાત્કાર કર્યો હતો. તે સમયે બિલ્કીસ 5 મહિનાની ગર્ભવતી હતી. એટલું જ નહીં તેના પરિવારના 7 સભ્યોની પણ હત્યા કરવામાં આવી હતી. બાકીના 6 સભ્યો ત્યાંથી ભાગી ગયા હતા.આ ઘટના પર નારાજગી વ્યક્ત કરતા સુપ્રીમ કોર્ટે CBI તપાસના આદેશ આપ્યા હતા. આ કેસના આરોપીઓની 2004માં ધરપકડ કરવામાં આવી હતી.
આ કેસની સુનાવણી અમદાવાદમાં શરૂ થઈ હતી. બિલ્કિસે પાછળથી ચિંતા વ્યક્ત કરી હતી કે ટ્રાયલ સાક્ષીઓને ડરાવી શકે છે અને પુરાવા સાથે ચેડાં કરી શકે છે. આ પછી સુપ્રીમ કોર્ટે કેસને અમદાવાદથી મુંબઈ ટ્રાન્સફર કર્યો હતો. 21 જાન્યુઆરી 2008ના રોજ સ્પેશિયલ સીબીઆઈ કોર્ટે 11 દોષિતોને આજીવન કેદની સજા ફટકારી હતી. વિશેષ કોર્ટે પુરાવાના અભાવે 7 દોષિતોને નિર્દોષ જાહેર કર્યા હતા. જ્યારે, ટ્રાયલ દરમિયાન એક દોષિતનું મોત થયું હતું. બાદમાં બોમ્બે હાઈકોર્ટે પણ ગુનેગારોની સજાને યથાવત રાખી હતી. 2019માં સુપ્રીમ કોર્ટે ગુજરાત સરકારને બિલ્કીસ બાનોને 50 લાખ રૂપિયાનું વળતર ચૂકવવાનો આદેશ આપ્યો હતો. તેમજ બિલ્કીસને નોકરી અને મકાન આપવાનો આદેશ કર્યો હતો.
