ખબર

આઇશા કેસ : પરિવારે કર્યા સાસરાવાળા પર ગંભીર આક્ષેપ, કહ્યુ આઇશા ગર્ભવતી હતી ત્યારે તેના સસરાએ…

અમદાવાદ શહેરમાં વટવાની આઈશા નામની યુવતીએ કરેલા આપઘાત કેસમાં હવે નવો ખુલાસો થયો છે. આઈશા એ આપઘાત પહેલા તેના પતિ આરીફ સાથે વાત કરી હતી.

આઈશાએ સામાન્ય વાતો શરૂ કરી હતી પણ આરીફ વારંવાર વટવામાં નોંધાવેલી ફરિયાદ પાછી લેવા દબાણ કરી ત્રાસ આપતો હતો અને તેથી જ તે તેને લઈ જવાની મનાઈ કરતો રહેતો હોવાનું પોલીસ તપાસમાં સામે આવ્યું છે.

આઇશા આત્મહત્યા કેસમાં મૃતક આઇશાના પિતાએ પોતાની વ્યથા મીડિયા સમક્ષ વ્યકત કરી. જેમાં આઇશાના પિતાએ ન્યાયની માંગ સાથે કરી છે. આઇશાના પિતાએ તેના સાસરિયાવાળા પર માર મારવાનો પણ આક્ષેપ કર્યો છે.

બીજી તરફ આરીફને શોધવા રિવરફ્રન્ટ પોલીસની એક ટીમ રાજસ્થાન પહોંચી છે. ત્યાં તેને શોધી રહી છે પણ એ વાત સામે આવી કે આઇશાએ આપઘાત કર્યા બાદ જે વીડિયો વાયરલ થયો તે જોઈને આરીફ ભાગી ગયો હતો. આરીફ કોઈ સબંધીના લગ્ન પ્રસંગમાં હતો અને ત્યાંથી જ તે ભાગી ગયો હોવાની વાત પોલીસને મળતા પોલીસે તે બાબતે હકીકત જાણવા પ્રયાસ કર્યા છે.

Image Source

આઇશાએ આપઘાત પહેલા અંતિમ વિડીયો બનાવ્યો હતો અને બાદમાં સાબરમતી નદીમા ઝંપલાવ્યુ હતું. અઢી વર્ષના લગ્ન જીવનમા પતિના માનસિક ત્રાસથી કંટાળીને યુવતીએ અંતિમ પગલુ ભર્યુ.

આઇશા ઉર્ફે સોનુના લગ્ન વર્ષ 2018માં રાજસ્થાન ખાતે રહેતા આરીફ ખાન સાથે કરાવ્યા હતા. લગ્ન બાદ આઇશાને તેનો પતિ અને સાસરિયાઓ દહેજ બાબતે ત્રાસ આપતા હતા. વર્ષ 2018માં ડિસેમ્બર માસમાં તેનો પતિ દહેજ માંગી ઝઘડો કરી આઇશાને પિયરમાં મૂકી ગયો હતો. બાદમાં સમાજના લોકો ભેગા કરી સમાધાન કરી તેને પાછી સાસરે વળાવી હતી. ફરીથી વર્ષ 2019માં આઇશાને તેના સાસરિયાઓ પિયરમાં મૂકી જતા આઇશા તેના માતા પિતા સાથે રહેતી હતી.

બાદમાં જમાઈ આરીફ આઇશાના ઘરે આવ્યો અને દહેજ માંગી દોઢ લાખ રૂપિયા લઈ ગયો હતો. બાદમાં ફરી આઇશાને તેડી જઈ પાછી તેને પિયરમાં મૂકી જતા આઇશાએ વટવા પોલીસ સ્ટેશનમાં પતિ, સાસુ-સસરા સહિતના લોકો સામે ફરિયાદ નોંધાવી હતી અને કોર્ટમાં પણ ડોમેસ્ટિક વાયોલન્સનો કેસ કર્યો હતો. આ પછી આઇશા બેંકમાં મ્યૂચ્યુલ ફંડ વિભાગમાં નોકરી કરવા લાગી હતી.

પોલીસ તપાસમાં એવું પણ સામે આવ્યું છે કે આરીફ અગાઉ આઇશાને પિયરમાં મૂકી ગયો ત્યારે સગર્ભાવસ્થામાં હતી. આઇશાએ વટવા પોલીસ સ્ટેશનમાં નોંધાવેલી ફરિયાદમાં આરીફ માર મારતો હોવાની પણ હકીકત દર્શાવી છે.

પિયરમાં આવ્યા બાદ આઇશા ટેન્શનમાં હોવાથી આઇશા એક હોસ્પિટલમાં બતાવવા ગઈ હતી અને બાદમાં ક્રિયટન કરાવ્યું હતું. અગાઉની ફરિયાદને લઈને આઇશાને પરત લઈ જવા આસિફ મનાઈ કરતો હતો અને ત્રાસ આપતો હતો. વારંવાર આઇશાને વટવામાં નોંધાવેલી ફરિયાદ પાછી ખેંચવા દબાણ કરતો હતો. મિડિયા અહેવાલ પ્રમાણે આરિફ તેને માર મારતો હતો તે પણ સામે આવ્યુ છે.

યુવતીનો અંતિમ વીડીયો અને પરિવાર સાથેની વાતચીતના ઓડીયોને લઈને પોલીસે પતિ વિરૂધ્ધ દુષ્પેરણાની ફરિયાદ નોંધી તપાસ શરૂ કરી છે. જો કે, આ અંગે આજે તેના પરિવાર દ્વારા પત્રકાર પરિષદ કરવામાં આવી હતી.

આઈશાએ તેના અંતિમ વીડિયોમાં પતિને ભલે માફી આપી હોય, પરંતુ તેના પિતા લિયાકતઅલી મકરાણી તેને માફ કરવા તૈયાર નથી. આઈશાના પિતાએ કહ્યું હતું કે, ‘મને કોઈ રૂમ ભરીને પૈસા આપે તો પણ હું મારી દીકરીના હત્યારાને માફ નહિ કરું. તેણે મારી દીકરીને આત્મહત્યા માટે મજબૂર કરી છે, તેની જિંદગી દોજખ બનાવી દીધી હતી. તે મારી દીકરીનો હત્યારો છે, તેને ક્યારેય માફ નહિ કરું.’

Image source

આઇશાના પરિવારે આરીફના અન્ય યુવતી સાથેના સંબંધ હોવાની વાત કરી. તો આઇશાની સાસુ અને નણંદ સામે પણ આક્ષેપો કર્યા હતા. આ સાથે આઇશાને દહેજ માટે પરેશાન કરાતી હોવાના પણ આક્ષેપો આઇશાના પિતાએ કર્યા હતા.