અમદાવાદના કુબેરનગરના 8 મિત્રોએ ઉદયપુર ફરવા જવાનું નક્કી કર્યું હતું. આ ગ્રુપ બુધવારે વહેલી સવારે ઉદયપુરથી Ahmedabad પરત ફરી રહી હતી. પરંતુ તેમની આ ટ્રીપ કરુણાંતિકામાં પરિણમી. હિંમતનગર નજીક નેશનલ હાઇવે 48 પર થયેલા ભયાનક અકસ્માતમાં સાત મિત્રોએ જીવ ગુમાવ્યા, જ્યારે એક ગંભીર રીતે ઘાયલ થયો છે.
આ દુર્ઘટના બુધવારે વહેલી સવારે હિંમતનગરના સહકારી જીન પાસે બની. મિત્રોની ઇનોવા કાર એક ટ્રેલરની પાછળ ધડાકાભેર અથડાઈ. અકસ્માત એટલો ભયાનક હતો કે કારનો કચ્ચરઘાણ નીકળી ગયો. ઘટનાસ્થળે પહોંચેલી ફાયર બ્રિગેડની ટીમે કટરની મદદથી કારના પતરા કાપીને મૃતદેહોને બહાર કાઢ્યા.
તમને જણાવી દઈએ કે આ અકસ્માતમાં 7 દોસ્તોના ઘટના સ્થળે કારમાં જ મોત નીપજ્યા હતા. જ્યારે અન્ય એક મિત્ર ગંભીર રીતે ઇજાગ્રસ્ત હાલતમાં સારવાર હેઠળ હોસ્પિટલ ખસેડાયો છે. અકસ્માતની આ ગંભીર ઘટના અંગે જાણ થતા જ સ્થાનિક ફાયર બ્રિગેડ ની ટીમે કારમાંથી તમામ મૃતદેહો બહાર કાઢી ઓળખ કરવાની કામગીરી શરૂ કરી હતી. જેમાં આઠે મિત્રો કુબેરનગર વિસ્તારમાં અલગ અલગ સોસાયટીમાં રહે છે. સાતેય દોસ્તોની અંતિમ યાત્રા કાઢી હતી. જ્યાં કુબેરનગર વિસ્તાર અને સિંધી સમાજ શોકમાં ગરકાવ થયો છે. ત્યારે સામાજિક આગેવાનોએ પણ મૃતકોને શ્રદ્ધાંજલિ આપવા વેપારીએ એક દિવસનો બંધ પાડવા આહવાન કરતા દુઃખ વ્યક્ત કર્યો હતું. સાથે જ બેદરકારી ભર્યું ડ્રાઇવિંગ ન કરવા પણ સલાહ આપી હતી.
આ કરુણ ઘટનામાં માત્ર પાછળની સીટ પર બેઠેલા એક યુવાનનો જીવ બચ્યો. તેને ગંભીર ઈજાઓ થતાં હિંમતનગરની સિવિલ હોસ્પિટલમાં દાખલ કરવામાં આવ્યો છે. દુર્ઘટના પહેલાં બનેલો એક વીડિયો સામે આવ્યો છે, જે આ અકસ્માતના કારણ તરફ ઇશારો કરે છે. મૃતક ભરતે પોતાના સોશિયલ મીડિયા સ્ટેટસમાં એક વીડિયો પોસ્ટ કર્યો હતો, જેમાં કાર 120 કિમી પ્રતિ કલાકથી વધુની ઝડપે દોડતી જોવા મળે છે.
વીડિયોમાં રોહિત રામચંદાણી ઓવરસ્પીડમાં કાર ચલાવતો દેખાય છે. ગાડીમાં મોજમસ્તીનું વાતાવરણ અને મોટા અવાજે સંગીત વાગતું જોવા મળે છે. વીડિયો સાથે કેપ્શનમાં લખ્યું હતું, “when bhai itne din ho gaye hai kanhi gaye nahi.” (ભાઈ, આટલા દિવસ થઈ ગયા, ક્યાંય ગયા નથી.) આ વીડિયો સૂચવે છે કે અકસ્માત ઓવરસ્પીડિંગને કારણે થયો હોઈ શકે છે.
આ દુઃખદ ઘટનાએ કુબેરનગર વિસ્તાર અને સમગ્ર અમદાવાદમાં શોકની લહેર ફેલાવી દીધી છે. એક જ વિસ્તારના સાત યુવાનોના અચાનક મૃત્યુના સમાચારે સમુદાયમાં આઘાતની લાગણી ઉત્પન્ન કરી છે. મૃતકોના પરિવારજનો હિંમતનગર સિવિલ હોસ્પિટલ પહોંચ્યા હતા, જ્યાં હૃદયદ્રાવક દૃશ્યો સર્જાયા હતા.
આ ઘટના યુવાનોમાં સુરક્ષિત ડ્રાઇવિંગની મહત્તા અંગે જાગૃતિ લાવવાની જરૂરિયાત પર ભાર મૂકે છે. ઓવરસ્પીડિંગ અને બેદરકાર ડ્રાઇવિંગ કેવી રીતે જીવલેણ સાબિત થઈ શકે છે તેનું આ એક દુઃખદ ઉદાહરણ છે. વધુમાં, આ દુર્ઘટના પરિવારો અને સમુદાયો પર થતી અકસ્માતોની લાંબા ગાળાની અસરને પણ ઉજાગર કરે છે.
ચિરાગ રવિભાઈ ધનવાની (ઉ.વ.23, રહે. કૈલાસરાજ હાઈટ્સ, કુબેરનગર)
રોહિત સુરેશભાઈ રામચંદાની (ઉ.વ.25, રહે. કુબેરનગર)
સાગર નરેશકુમાર ઉદાણી (ઉ.વ.22, રહે. કુબેરનગર)
ગોવિંદ લાલચંદભાઈ રામરાણી (ઉ.વ.28, રહે. કુબેરનગર)
રાહુલ પ્રહલાદભાઈ મુલચંદાની (ઉ.વ.22, રહે. કુબેરનગર)
રોહિત (રહે. કુબેરનગર)
ભરત (રહે. કુબેરનગર)
સાબરકાંઠામાં ગમખ્વાર અકસ્માત કેસમાં ખુલાસા, 120થી વધુની સ્પીડે મોજ મસ્તી સાથે ચાલી રહી હતી કાર#Sabarkantha #Accident #death #News18Gujarati pic.twitter.com/1ZJzxF2vYV
— News18Gujarati (@News18Guj) September 26, 2024
