ખબર

અમેરિકાના ન્યુયોર્કમાં 2 શીખ યુવકો પર હુમલો : ડંડાથી માર્યા, પાઘડી પણ ઉતારાવી, 10 દિવસની અંદર …

ગુજરાત સહિત દેશભરમાંથી અનેક લોકો ભણવા માટે કે કામ માટે વિદેશ જતા હોય છે. જેમાં અમેરિકા, કેનેડા અને લંડન જેવી જગ્યાઓ પર જવાનું લોકો વધુ પસંદ કરે છે. પરંતુ ઘણીવાર વિદેશમાં વસતા ભારતના લોકોની હત્યાનો મામલો સામે આવે છે. તો ઘણીવાર તેમના પર હુમલાનો મામલો પણ સામે આવે છે. ત્યારે હાલમાં અમેરિકામાં બે શીખો પર હુમલાનો મામલો સામે આવ્યો છે. ઘટના ન્યૂયોર્કના રિચમંડ હિલ્સ વિસ્તારની છે. મંગળવારે સવારે બે શીખ મોર્નિંગ વોક માટે નીકળ્યા હતા, ત્યારે ત્યાં પહોંચેલા બે શંકાસ્પદ યુવાનોએ શીખો પર હુમલો કર્યો, પહેલા લાકડી વડે માર્યા અને પછી પાઘડી ઉતારી.

તમને જણાવી દઈએ કે આ એ જ જગ્યા છે જ્યાં 10 દિવસ પહેલા બે શીખો પર હુમલો થયો હતો. આ ઘટનાને લઈને ભારતમાં ભારે રોષ જોવા મળી રહ્યો છે. આ વીડિયો ન્યૂયોર્કના રિચમંડ હિલ પાસે બે શીખ યુવકો પર હુમલાનો છે. પોલીસના જણાવ્યા અનુસાર આ કેસમાં એક વ્યક્તિની ધરપકડ કરવામાં આવી છે. તેની સામે હેટ ક્રાઈમ હેઠળ કેસ નોંધીને તપાસ કરવામાં આવી રહી છે. સ્થાનિક મીડિયા રિપોર્ટ્સ અનુસાર, કેટલાક લોકોએ પહેલા રસ્તા પર ચાલતા શીખ યુવકોને લાકડી વડે માર માર્યો હતો અને પછી તેમની પાઘડી ઉતારી દીધી હતી.

ઘટનાની જાણ થતાં પોલીસ કાફલો ઘટના સ્થળે પહોંચ્યો ત્યાં સુધીમાં આરોપી નાસી ગયો હતો. શીખ સંગઠન સાથે સંકળાયેલા સ્થાનિક નેતાઓ પણ ઘટનાસ્થળે પહોંચી ગયા હતા અને પોલીસ વિરુદ્ધ સૂત્રોચ્ચાર કર્યા હતા.દિલ્હીની રાજનીતિ સાથે જોડાયેલા મનજીન્દર સિંહ સિરસાએ આ હુમલા સાથે સંબંધિત એક વીડિયો શેર કરીને નારાજગી વ્યક્ત કરી હતી. તેણે લખ્યું કે રિચમંડ એ જ વિસ્તાર છે જ્યાં 10 દિવસ પહેલા શીખો પર હુમલો થયો હતો. તેની નિંદા કરતા તેમણે કહ્યું કે આ મામલાની તપાસ થવી જોઈએ અને ગુનેગારોને દાખલો બેસાડીને સજા કરવાની જરૂર છે.

બીજી તરફ ન્યૂયોર્કમાં ભારતના કોન્સ્યુલેટ જનરલે પણ આ હુમલાની નિંદા કરી છે. તેને “નિંદાપાત્ર” ગણાવતા દૂતાવાસે કહ્યું કે તે પોલીસ અને પીડિતાના પરિવારના સંપર્કમાં છે. આ કેસમાં એક વ્યક્તિની ધરપકડ કરવામાં આવી છે. ન્યૂયોર્કના એટર્ની જનરલ લેટિશિયા જેમ્સે પણ હુમલાની નિંદા કરી છે અને પીડિતો માટે ન્યાયની અપીલ કરી છે. સાથે જ તેણે અપીલ કરી છે કે જે કોઈને પણ હુમલાખોરો વિશે માહિતી હોય તેણે ન્યૂયોર્ક પોલીસને જાણ કરવી જોઈએ. એક રીપોર્ટ અનુસાર, ન્યૂયોર્ક એસેમ્બલીના પ્રથમ શીખ મહિલા સભ્ય જેનિફર રાજકુમારે ટ્વીટ કર્યું કે આ ચિંતાજનક સ્થિતિ છે.

અમેરિકામાં શીખ સમુદાય વિરુદ્ધ નફરતના ગુનાના મામલા વધી રહ્યા છે. તેમણે કહ્યું કે આવી ઘટના 10 દિવસ પહેલા રિચમંડ હિલ વિસ્તારમાં જ બની હતી, છતાં પોલીસ એલર્ટ થઈ નથી. જણાવી દઈએ કે માર્ચ 2020થી જૂન 2021ની વચ્ચે સ્ટોપ હેટ અગેન્સ્ટ એશિયન અમેરિકન્સ કેમ્પેઈન પોર્ટલ પર હેટ ક્રાઈમના 9,081 કેસ નોંધાયા છે. જેમાંથી વર્ષ 2020માં 4,548 અને 2021માં 4,533 કેસ નોંધાયા હતા. 2020માં હેટ ક્રાઈમના વધતા જતા મામલાને જોતા અમેરિકન એજન્સી એફબીઆઈએ તેમની તપાસ કરવાનું કહ્યું હતું.