સુરભિ : પીરિયડ્સમાં મુસાફરી કરી રહેલ છોકરીની પ્રેમકથા !

0

સુરભિ : પીરિયડ્સમાં મુસાફરી કરી રહેલ છોકરીની પ્રેમકથા !

અમદાવાદની અસહ્ય ગરમીમાં સુરત જવા માટે હું બસમાં બેઠો ! બસમાં એટલી ભીડ હતી કે પરસેવો લુછવા માટે રૂમાલ પણ ન કાઢી શકાય ! મારી બેગને મેં થોડી સરકાવી અને સીટ નીચે મૂકી. જેમ જેમ અંતર કપાતું હતું તેમ તેમ બસમાં ભીડ વધતી જતી હતી. સાંજના પાંચ વાગ્યે વડોદરા આવ્યું અને હું નીચે ઉતર્યો અને ફ્રેશ થઈને પાછો બસમાં બેઠો. જોયું તો બસમાં એક સીટ ખાલી હતી ! હું ઝડપથી ત્યાં ગયો અને એ સીટ પર બેસી ગયો. બસ ઉપડી અને ત્યારે કંડક્ટરે ઘંટડી વગાડી અને બસમાં એક છોકરી ચઢી ! એ છોકરી પાસે એક મોટી ટ્રોલી બેગ હતી અને હાથમાં એક પર્સ હતું. હું કંડક્ટરની પાછળની જ સીટ પર બેઠો હતો અને એ મારી સીટની બાજુમાં જ ઉભી હતી, બસમાં એટલી તે ભીડ હતી કે એ છોકરીએ પોતાના એક હાથે બેગ પકડેલી હતી અને એક હાથથી ચહેરાનો પરસેવો લૂછતી હતી ! મેં એની તરફ જોયું અને એણે અચાનક મારી તરફ જોયું અને મેં મોઢું ફેરવી લીધું ! શાળા અને કૉલેજમાં ઘણીવાર કહેવામાં આવતું કે બસમાં કોઈ વ્યક્તિને પોતાની સીટ આપવી જોઈએ ! મારા મનમાં ઘણી મુંઝવણ હતી. એકવાર તો થયું કે મારી સીટ એ છોકરીને આપી દઉં, પણ એજ સમયે વિચાર આવ્યો કે બધા લોકોને એવું લાગશે કે હું છોકરી પર લાઈન મારું છું તો ? કેમ કે બસમાં ઘણી છોકરીઓ હતી અને એ પણ આ છોકરીની માફક ઉભી જ હતી પણ આ છોકરીના ચહેરા પર બેચેની ચોખ્ખી દેખાતી હતી. મેં નિર્ણય લઈ લીધો હતો કે આ છોકરીને સીટ આપી જ દઉં અને બીજો વિચાર એ આવ્યો કે હું આ છોકરીને સીટ આપું એના કરતાં સામે જે અંકલ ઉભા છે એમને કેમ ન આપું ? કારણ કે આ છોકરી યુવા હતી ! વિચારોની આ લડાઈમાં હું જ ફસાતો ગયો. એ છોકરી બીમાર હોય એમ લાગતી હતી અને મેં એ છોકરીની સામે જોઇને કહ્યું, સ્ક્યુઝમી, તમારે બેસવું હોય તો ? એણે કહ્યુ, ના ના હું આમ જ ઠીક છું ? મને ખબર હતી કે એ ઠીક નથી ! હું ઉભો થઈ ગયો અને કહ્યું, બેસો ! એ કંઈ ન બોલી અને સીટ પર બેસી ગઈ. એના ચહેરા પણ હળવું સ્મિત હતું ! એણે મારી સામે જોઈને કહ્યું, તમારી બેગ મને આપો ! એણે પોતાના ખોળામાં મારી બેગ રાખી. એ છોકરીએ પોતાનું માથું આગળની સીટ ટેકવી દીધું, એ ઘણીવાર પોતાની કમર પર હાથ રાખતી હતી. મેં પૂછ્યું, આર યુ ઓકે ? એણે કહ્યું,યસ ડોન્ટ વરી ! વચ્ચે હોટેલ આવી અને કન્ડક્ટરે કહ્યું, પંદર મિનિટ માટે બસ ઉભી રહેશે ! એ છોકરીએ મને મારું હેન્ડબેગ આપ્યું અને હું નીચે ઉતર્યો ! એ છોકરી ધીમે ધીમે બસની સીડી ઉતરતી હતી અને છેલ્લા પગથિયે એનો પગ લાપસ્યો અને મેં એનો હાથ પકડી લીધો ! અમે બન્ને મૌન હતાં અને ત્યારે એ બોલી, થેન્ક્સ ! મેં કહ્યું, સંભાળીને ! એ બોલી, વોશરૂમ ક્યાં છે ? મેં કહ્યું સીધા જાઓ અને લેફ્ટ સાઈડમાં લેડીઝ ટોયલેટ છે ! એ થેન્ક્સ કહીને ઝડપથી વોશરૂમ માટે ગઈ ! મને ખ્યાલ આવી ગયો હતો કે એ છોકરી પીરિયડ્સમાં છે ! સાંજના સાડા છ વાગ્યા, મેં હોટેલ પર ચા પીધી અને બસમાં ગયો અને જોયું તો એ છોકરી બસમાં જ બેઠી હતી ! હું એની બાજુમાં ઉભો રહ્યો અને એણે હાથ લંબાવીને કહ્યું, “બેગ !” મેં મારી હેન્ડબેગ એને આપી. એના ચહેરા પર શાંતિ નજર આવતી હતી ! ભરૂચ આવ્યું અને બાજુની સીટ ખાલી થઈ અને એ છોકરી વિન્ડો સીટ તરફ સરકી અને હું એની બાજુની સીટ પર બેઠો !

નર્મદાના શાંત નીર જાણે આંખોમાં ટાઢક આપતાં હોય એમ લાગતું હતું ! મેં લેપટોપ કાઢીને લખવાનું શરું કર્યું. એ છોકરી મારા લેપટોપમાં જોવા લાગી અને બોલી, તમે રાઇટર છો ? મેં હસતાં હસતાં કહ્યું, ના બસ થોડુંક લખું છું ! એણે કહ્યું, મેં તમારા બ્લોગ્સ વાંચેલા છે ! મેં કહ્યું, થેન્ક્સ ! હું વિચારતો હતો કે એણે મારો કયો આર્ટિકલ વાંચ્યો હશે ? મેં પણ પૂછી લીધું, તમે મારો કયો આર્ટિકલ વાંચ્યો છે ? એણે કહ્યું, જાતિવાદ પરનો ! મેં કહ્યું, ઓકે ! એણે હાથ લંબાવ્યો અને કહ્યું, હાય, આઇ’મ સુરભિ ! મેં કહ્યું, હાય આઇ’મ પ્રકાર ! એણે કહ્યું, નાઇસ નેમ ! મેં પણ કહી જ દીધું, યુ ટુ ! હું અને સુરભિ હવે અજાણ્યા તો નહોતા જ રહ્યાં ! અમે વાતો કરતાં હતાં અને અચાનક બસ હાલક ડોલક થવા લાગી અને ડ્રાઇવરે બસને ઉભી રાખી ! ડ્રાઇવર ઉતર્યો અનેક કહ્યું, પંચર છે, તો બધા ઉતરો વીસ મિનિટ માટે ! હું અને સુરભિ પણ નીચે ઉતર્યા. બાજુમાં એક રેસ્ટોરન્ટ હતી અને બધા લોકો ત્યાં ગયા. મેં સુરભિને પૂછ્યું, તમારે કંઈ લેવું છે ? એણે ઇનકાર કર્યો. હું રેસ્ટોરન્ટમાં ગયો અને એક પાણીની બોટલ લીધી અને મને ખ્યાલ હતો કે સુરભિએ કંઈ જ નથી ખાધું એટલે હું એની માટે જ્યુસ લઈ ગયો. મેં કહ્યું, આ તમારા માટે ! એણે મારી આંખમાં જોયું અને કહ્યુ, તમે શા માટે તકલીફ લો છો ? મેં કહ્યું એમાં તકલીફ ન હોય ! એ જયુસ પીવા લાગી અને ત્યાં તો કંડક્ટરે અવાજ લગાવ્યો, એ બધા બસમાં બેસી જાઓ ! અમે બસમાં બેઠા, અંધારું થઈ ચૂક્યું હતું.

રાત્રે દસ વાગ્યે સુરત આવ્યું અને હું અને સુરભિ બસ સ્ટેશન પર ઉતર્યા ! એ થોડી ચિંતામાં હતી અને કોઈકને ફૉન લગાવતી હતી ! મેં કહ્યું શું થયું ? સુરભિએ કહ્યું, મારા મામા મને લેવા આવવાના હતાં અને એ કહે છે કે હું કલાક પછી આવીશ ! મેં પૂછ્યું, કેમ ? એણે કહ્યું, મારા મામા સુરતની બહાર રહે છે ! મેં સુરભિને કહ્યું, બસસ્ટેશનની પાછળ જ મારું ઘર છે ! તમે ચાહો તો ત્યાં આવી શકો છો ? એણે કહ્યું, આઈ’મ સોરી હું તમને વધારે તકલીફ નથી આપવા માંગતી ! મેં કહ્યું, એમાં તકલીફ ન હોય, તમારા મામાને કહી દો કે મારા ઘરે જ લેવા આવે અને આટલી રાત્રે તમે બસસ્ટેશનમાં બેસો એ પણ યોગ્ય ન કહેવાય ! એણે કહ્યું, ઓકે ! બસસ્ટેશનની પાછળ મારું ઘર હતું એટલે હું અને સુરભિ ચાલતાં જ ત્યાં જતાં હતાં, અને રસ્તામાં મેં મારી મમ્મીને ફૉન કરીને પણ કહી દીધું કે સુરભિ આવે છે અને એની માટે પણ જમવાનું બનાવી રાખે ! હું અને સુરભિ ઘરે પહોંચ્યા અને મમ્મીએ સુરભિનું સ્વાગત કર્યું. મારી બહેન નેહા પણ ઘરે જ હતી. મેં નેહાને કહ્યું, સુરભિને તારા રૂમમાં લઈ જા એટલે ફ્રેશ થઈને જમવા બેસીએ. ત્યારે સુરભિએ કહ્યું, જમવા ? મેં કહ્યું, હા ! એણે કહ્યું, મને ભૂખ નથી ! મેં હસતાં હસતાં કહ્યું, મને ખબર છે કે તમને કેટલી ભૂખ છે ! એ કંઈ જ ન બોલી અને સ્મિત આપીને નેહા સાથે એના રૂમમાં ગઈ અને હું પણ મારા રૂમમાં ફ્રેશ થવા ગયો !

હું ફ્રેશ થઇને બહાર આવ્યો અને ત્યારે જ મારી બહેન નેહા મારી બાજુમાં આવી અને કહ્યું, ભાઈ આ સુંદર છોકરી કોણ છે ? તારા બહુ જ વખાણ કરતી હતી ! મેં મસ્તીમાં કહ્યું, તારી ભાભી ! ત્યારે નેહા બોલી, મમ્મી ! મેં કહ્યું, ચૂપ રે વાંદરી…તારે જેટલા નવા કપડાં લેવા હોય એટલા હું લઈ આપીશ, પણ ચૂપ રેજે ! નેહાએ કહ્યું, આ થઈને મસ્ત વાત ! અમે ચારેય જણ જમવા માટે બેઠા અને મેં કહ્યું, મમ્મી પપ્પા ક્યાં છે ? મમ્મીએ કહ્યું, બેટા પપ્પા એક લગ્નમાં ગયા છે તો તમને આવતાં વાર લાગશે ! મમ્મીએ સુરભિને કહ્યું, બેટા તારા મામા ક્યાં રહે છે ? આમ સુરભિ અને મમ્મીની વાતો ચાલુ થઈ ગઈ ! બધા જમીને ધાબા પર બેઠા અને સુરભિએ મને કહ્યું, પ્રકાર આપણે આજે બપોરે જ મળ્યાં અને કેટલા સારા મિત્રો બની ગયા નહીં ! મેં કહ્યું, હા ! એણે કહ્યું, પ્રકાર તારો મોબાઈલ આપજે તો ? ને સુરભિને મોબાઈલ આપ્યો અને એ કંઈક મોબાઈલમાં લખતી હતી ! એણે મને મોબાઈલ આપતાં કહ્યું, લે આમાં મારો નંબર સેવ કરી દીધો છે ! હું મનમાં બહુ જ હરખાતો હતો અને નેહા મને સાઈડમાં કોણી મારતી હતી !

મમ્મી અને સુરભિ બન્ને વાતો કરતાં હતાં અને સુરભિને કોઈકનો ફૉન આવ્યો ! સુરભિએ કહ્યું, મારા મામા આવી ગયા છે અને નીચે ઊભા છે. મેં કહ્યું ચાલ હું તારી બેગ લઈને નીચે સુધી આવું. હું નેહાના રૂમમાં સુરભિની બેગ લેવા ગયો, સુરભિ પાછળ જ હતી. હું અચાનક ઉભો થયો અને સુરભિને મારો ખભો વાગ્યો અને સુરભિનો પગ લપસ્યો અને એ મારા પર પડી ! સુરભિને મેં ઉભી કરી અને અમે બંને એક સાથે બોલ્યા, સોરી ! સુરભિના ચહેરા પર સ્મિત હતું અને એ બોલી, હું પંદર દિવસ માટે સુરત છું. મેં કહ્યું, તો હું પણ પંદર દિવસ માટે ! એ બોલી, શું ? અને ત્યારે જ નેહા ઉધરસ ખાવા લાગી ! હું સુરભિને મુકવા નીચે સુધી ગયો અને એના મામાએ પણ મારો આભાર માન્યો ! હું સુરભિને મૂકીને આવ્યો અને ઉપર મારા રૂમમાં સુવા ગયો અને ફોન લઈને જોયું તો સુરભિનો મેસેજ હતો, આજે બહુ જ મજા આવી ! આમ, મુસાફરીનો થાક લાગ્યો હોવા છતાં હું અને સુરભિ આખી રાત વોટ્સએપ પર વાતો કરતાં રહ્યાં અને સુરભિએ મારું જીવન સુરભીનું કરી દીધું !

લેખક :- પ્રદિપ પ્રજાપતિ

જો તું મને છોડવા ઈચ્છે તો કંઈ બોલ્યા વગર જ ચાલ્યો જજે ! સાચો પ્રેમ એટલે શું? વાંચો

“તું મને કેટલો પ્રેમ કરે છે ?” આ સવાલ દરેક પ્રેમીઓનો હશે ! પ્રેમ અને મકાન એક જેવા જ હોય છે, થોડો સમય તો માંગે જ છે ! પણ જ્યારે આપણે મુશ્કેલીઓની વચ્ચે હોઇએ ત્યારે તારણહારનું કામ કરે છે ! મૌલિક વાતોમાં હાસ્ય હોય ? મારું તો એટલું જ કહેવું છે કે કેમ ન હોય ! પ્રેમમાં હાસ્ય તો હોવું જ જોઈએ અને તાર્કિક રીતે જોવા જઈએ તો પ્રેમ એ સૌથી મોટું અને મૌલિક હાસ્ય છે ! કોઈ વ્યક્તિ શા માટે બધુ છોડીને એક છોકરી પાછળ પોતાનો સમય વ્યર્થ કરે ? અને સામે એ છોકરી પોતાની જિંદગીને એ છોકરાના નામે કેમ કરતી હશે ? આ બધા સવાલોનો જવાબ તો પ્રેમના અનુભવથી જ થાય !

જેમ કોઈ લોકલ ટેક્સીમાં બેકસાઈડ જોવા માટે મિરર હોય છે, પણ તેનો ઉપયોગ કયો પેસેન્જર ઉતર્યો કે ચઢ્યો એના માટે થતો હોય છે ! એજ રીતે પ્રેમમાં કેટલાક પાસા એવા છે કે જેનો ઉપયોગ તો પ્રેમ થયા બાદ જ ખબર પડે ! શા માટે કોઈને ફેસબુક કે અન્ય સોશિયલ સાઇટ પર પ્રેમ ન થાય ? ત્યાં બધા તો ફેક નથી જ ને ? પ્રેમ માટે ઘણું લખાયું છે અને મોટાભાગે અનુભવથી જ લખાયું છે ! સમાજને પ્રેમનો મોટો દુશ્મન ગણાવાય છે, કેમ કે પ્રેમમાં લગ્ન સમયે સમાજ શું કહેશે ? એ ડર હોય છે ! એરેન્જ મેરેજમાં પણ પ્રેમ થાય જ છે ! એક કપલ મુંબઈના એરપોર્ટ પર બેઠું હતું અને પતિ વોશરૂમમાં જાય છે અને આવીને જુએ છે કે ત્યાં તેની પત્ની નથી ? શું તેને ચિંતા નહીં થાય ? સવાલો તો ઘણા છે આ જિંદગી અને મોત વચ્ચે, પણ અનુભવ અને જ્ઞાનથી આશા છે કે આ અજ્ઞાનનો ખાડો પુરાશે !

મહેનત તો દરેક વાતમાં જરૂરી છે, તો પછી પ્રેમમાં તો હોય જ ને ! કહેવતો કે શાયરીઓ કહેવાથી પ્રેમ ન થાય ! સાચો પ્રેમ અને સોશિયલ મીડિયાના પ્રેમમાં તફાવત માત્ર એટલો જ છે કે સાચા પ્રેમમાં અભિમાન નીકળી જાય ! જે તમને દેખાય એના પર તમે કેટલો વિશ્વાસ કરો છો, એ તમારા જ્ઞાન અને અનુભવના આધારે નક્કી કરશો ! પણ પ્રેમમાં તો જ્ઞાન નકામું જ છે, કારણ કે બધાનો સિલેબસ જ અલગ અલગ હોય છે ! મારા અનુભવ પ્રમાણે કહું તો પ્રેમમાં સરળ સરળ રહેવું જોઈએ, કેમ કે પ્રેમ જ મહાન શક્તિ છે ! આપણા ઈતિહાસથી માંડીને ધર્મ ગ્રંથોમાં પ્રેમનો તો ઉલ્લેખ છે, પણ એ વર્તમાન માટે એટલું ઉપયોગી નહીં નીવડે ! પ્રેમ એ પરમેશ્વરથી નજીક છે, પણ સત્ય એમાં મુખ્ય છે ! જો તમે પ્રેમમાં હોવ અને સ્ત્રી હોવ તો પુરુષને સમજો અને જો તમે પુરુષ છો, તો સ્ત્રીને સ્વતંત્રતા અને સન્માન આપો !

મુખ્યત્વે યાદોમાં જ પ્રેમ થાય છે અને એ યાદો એટલી મધુરી લાગે છે કે જીવનમાં એના જેવું સુખ નહીં, પણ એ યાદો જ છે ! પ્રેક્ટિકલ લાઈફના એપ્રોચને સ્વીકારવો જોઈએ અને પ્રેમને પ્રેક્ટિકલી અપનાવવો જોઈએ ! પ્રેમ એ પ્રેમ છે અને પ્રેમ એ પરમતત્વનો જ પર્યાય છે એટલે જ પ્રેમમાં (સાચા પ્રેમમાં) તાકાત હોય છે અને પ્રેમ તો પ્રેમ છે તો આ સાચો ખોટો પ્રેમ ? પ્રેમ ક્યારેય ખોટો નથી હોતો પણ ઘણીવાર આકર્ષણને પ્રેમ સમજી બેઠાં હોઈએ તો એ સૌથી મોટો ભ્રમ છે ! કોલેજમાં કોઈને કોઈ સાથે આપણું આકર્ષણ તો થતું જ હોય છે પણ એને પ્રેમ તો ના જ કહેવાય અને કદાચ આ આકર્ષણ ને પ્રેમ સમજી બેસીએ અને એ છોકરી કે છોકરા સાથે આપણા સંબંધો (શારીરિક સંબંધો નહીં) શરૂ થાય અને જ્યારે એક બીજાના દુર્ગુણોનો પરિચય થાય ત્યારે શા માટે એક બીજાને છોડવાની વાત આવે છે ? જ્યારે પણ એકબીજાને છોડવાની વાત આવે ત્યારે મોટા ભાગના છોકરાઓ એમ કહે છે કે “ભગવાન શ્રી કૃષ્ણએ રાધા સાથે પ્રેમ કર્યો હતો છતાં તેમણે લગ્ન રાધા સાથે નહોતા કર્યા”. આ વાક્ય છોડવાના એટલે કે બ્રેકઅપના ટાઈમ પર આવે છે અને જ્યારે એકબીજાને મળ્યાં રોમિયો અને જુલિએટની વાતો કરતાં હોય છે ! એટલે જ આજે કોલેજોમાં ભાગ્યે જ પ્રેમ જોવા મળે છે બાકી તો પ્રેમને “સેટિંગ” નામના શબ્દથી પ્રયોજવામાં આવે છે !

આજનો પ્રેમ એ એન્ડ્રોઈડ જેવો થઈ ગયો છે, ક્યારે અપડેટ આવે તેનો ખ્યાલ જ ન રહે ! પ્રેમ પર ઘણું સાહિત્ય મળી રહે છે પણ પ્રેમ કઈ રીતે કરવો ? એવું કોઈ સાહિત્ય શોધવા જઈએ તો કદાચ ક્યારેય ના મળે ! પ્રેમ એ મોબાઈલ જેવો જ છે બધામાં જુદી જુદી સિસ્ટમ્સ હોય છે અને ક્યારેય એકબીજાની સિસ્ટમ્સને કોપી નથી મારી શકાતી અને જો કોઈ ફેક સિસ્ટમ લાવી અને એની સાથે કોપી મારવામાં આવે તો આખા ફોનની સિસ્ટમ ખરાબ થઈ શકે છે એવી જ રીતે પ્રેમમાં પણ કોઈની કોપી ન મારી શકાય એ તો નૈતિક અને નિખાલસ છે. પ્રેમમાં નિખાલસતા અને સરળતા હોય છે, સૌ પ્રથમ પ્રેમ એકબીજાના વિચારો અને વ્યવહારો (બીજા લોકો સાથેના સંબંધો)થી થાય છે અને ત્યાર બાદ શરીરની વાત આવે છે શરીરનું સુખ સૌએ ભોગવવું જ જોઈએ એમાં કંઈ ખોટું નથી પણ સાથે સમજદારી અને જવાબદારીનું પણ ભાન હોવું જરૂરી છે.

પ્રેમ એ સ્વપ્ન જેવો છે કે જેમાં દરેક જગ્યાએ તમારી પ્રિયતમાનાં દર્શન થતાં હોય અને વિચારોમાં આવતાં સુવિચાર તરીકે જોવા મળે ! પ્રેમમાં બન્ને પાત્રો સરળતાથી એકબીજાની સાથે બેસી શકે, સાથે હસી શકે અને સાથે રડી પણ શકે ! કદાચ આ જ જીવનની સૌથી મોટી સફળતા છે ! આજના સમયમાં બે પ્રેમીઓ સાથે હસતાં રમતાં જોવા મળે તો આપણે પહેલી નજરમાં તેને મિત્રો જ સમજીશું કારણકે આજના સમયમાં પ્રેમીઓ એટલે હાથ પકડીને અને બાથ ભરીને બેસતાં છોકરો છોકરી ! સાચો પ્રેમ એ તમારી પ્રેમિકા માટે હોય કે ભગવાન માટે એ તો સરખો જ છે કારણકે બિનશરતી પ્રેમ એ ઈશ્વરનો પર્યાય છે. પ્રેમની બધી કવિતાઓ કે ગીતો એ તમારી પ્રેમિકા માટે વાંચો કે ઈશ્વર માટે એ સરખું જ છે, ખાલી શબ્દો બદલાય છે પણ ભાવ તો એજ રહે છે !

પ્રેમમાં આદર, સત્કાર અને વિવેક મોખરે હોવો જોઈએ કારણકે આ પરિબળો જ પ્રેમને મજબૂત રાખે છે ! જીવનમાં પ્રેમનાં સ્વરૂપ બદલાતા રહે છે અને પ્રેમનો એપ્રોચ બદલાય છે બાકી તો પ્રેમ જ ગોડ પાર્ટીકલ્સ જેવો છે સર્વે છે પણ અનુભવ માત્ર પ્રેમને જાણનાર અને સ્વીકારનાર જ કરી શકે ! સૌથી પ્રથમ આપણે આપણી જાતને પ્રેમ કરતાં શીખવું પડશે કેમ કે પોતાનામાં જ પ્રેમ નહિ હોય તો બીજાને શું આપીશું ? જે વ્યક્તિ પોતાની જાતને પ્રેમ કરે છે એ જ બીજાને પ્રેમ કરી શકે છે કારણકે ત્યારે તે વ્યક્તિ માંથી અહંકાર જતો રહે છે. જે રીતે ખાલી ગ્લાસમાં પાણી નાખવાથી હવા આપોઆપ જતી રહે છે એ જ રીતે જીવનમાં પ્રેમ આવવાથી બધા જ દર્દો ધીમે ધીમે જતાં રહે છે. પોતાની જાતને પ્રેમ કર્યા બાદ પોતાના જ જીવનને ચાહવું જોઈએ, ત્યારે જ તો તમે બીજાના જીવનને ચાહી શકશો ! આમ ધીમે ધીમે મનમાં રહેલા વિચારો સુવિચારો બનતાં જશે.

લેખક : પ્રદિપ પ્રજાપતિ

તમે આ લેખ ‘GujjuRocks ‘ ના સહયોગ થી વાંચી રહ્યા છો. આ લેખ નું લખાણ કોપી કરતા પહેલા અમારી લેખિત મંજુરી લેવી જરૂરી છે. આર્ટિકલ વાંચવા બદલ આભાર

લાખો ગુજરાતીઓનું લોકલાડીલું ફેસબુક પેઈજ લાઇક કર્યું ?

આ લેખ ગમ્યો હોય તો તમારા મિત્રો સાથે જરૂર Share કરજો..!!

LEAVE A REPLY

Please enter your comment!
Please enter your name here