ભગવાનનું ગણિત હમેશા સાચું અને સારું જ હોય – શ્રદ્ધા રાખજો !!

0

ગામડામાં રહેતા એક ખેડુત પાસે એક જાતવાન ઘોડો હતો. આખા પંથકમાં બધા એના આ ઘોડાના ખુબ વખાણ કરતા. કેટલાય ઘોડેસ્વારો આ ઘોડાના મો માંગ્યા દામ આપવા તૈયાર હતા પરંતું ખેડુત ઘોડો વેંચવા માંગતો નહોતો કારણકે એ ઘોડાને ખુબ પ્રેમ કરતો હતો.

એકદિવસ સવારે જાગીને એણે જોયુ તો એનો ઘોડો ગાયબ હતો. એણે ઘોડાને શોધવાના ખુબ પ્રયાસ કર્યા પણ ઘોડો ન મળ્યો. ગામના લોકોએ આ ખેડુતને કહ્યુ , “ ભાઇ, તમારા નસીબ ખરાબ છે કે તમારો જાતવાન ઘોડો ચોરાઇ ગયો.” ખેડુતે ગામ લોકોને કહ્યુ , “ મારા નસીબ ખરાબ છે કે સારા એ નક્કી કરનારો હું કે તમે કોણ ? કુદરતના આયોજનને સમજી શકવા માટે આપણે કોઇ સક્ષમ નથી.”

ગામ લોકો તો અંદરો અંદર વાતો કરતા જતા રહ્યા કે “ આ ડોહાનું ચસકી ગયુ છે એનો ઘોડો જતો રહ્યો એના આઘાતમાં આવી વાતો કરે છે.”. થોડા દિવસ પછી ઘોડો પાછો આવ્યો અને એની સાથે બીજા 10 જંગલી ઘોડાને લાવ્યો. ગામ લોકોને આ સમાચાર મળ્યા એટલે બધા ખેડુતને મળવા આવ્યા અને કહ્યુ , “ તમે તે દિવસે સાચુ કહેતા હતા. તમારા નસિબ ખરાબ નહી સારા છે અને એટલે આ ઘોડો બીજા 10 ઘોડાને પોતાની સાથે લાવ્યો છે.” ખેડુતે કહ્યુ, “ તમે હજુ તમે મારી વાત ને સમજી શક્યા નથી. આ ઘટના મારા સારા નસિબ છે એમ પણ ન કહી શકાય.”

થોડા દિવસ બાદ નવા આવેલા જંગલી ઘોડાને તાલીમ આપતી વખતે ખેડુતનો એકનો એક યુવાન દિકરો ઘોડા પરથી પડ્યો અને એના હાથ-પગ ભાંગી ગયા. ખેડુતનો એકમાત્ર આધાર પથારીવશ થઇ ગયો. ગામલોકો ખબર કાઢવા આવ્યા અને કહ્યુ , “ તમારી વાત બીલકુલ સાચી હતી. આ જંગલી ઘોડાઓ આવ્યા તે તમારા સારા નસિબ નહોતા જો ઘોડા ના આવ્યા હોત તો તમારો દિકરો સાવ સાજો નરવો હોત.તમારા નસિબ ખરાબ કે દિકરો ખાટલે પડ્યો.” ખેડુતે દુ:ખી થતા કહ્યુ , “ ભાઇઓ દિકરાના હાથપગ ભાંગ્યા તો એ મારા ખરાબ નસિબ છે એમ પણ ન કહેવાય કારણકે કુદરતના કાર્યનો તાગ કાઢવો મુશ્કેલ છે.”

થોડા સમય પછી યુધ્ધ જાહેર થયુ. સરકારના માણસો ગામમાં આવીને બધા જ યુવાનોને યુધ્ધમાં લડાઇ કરવા માટે ફરજીયાત લઇ ગયા પણ આ ખેડુતના દિકરાને છોડી દીધો કારણકે એ તો લડી શકે તેમ હતો જ નહી. ગામલોકો ફરી આ ખેડુતની ઘરે ગયા અને કહ્યુ , “ તમારા નસિબ સારા છે કે તમારા દિકરાના હાથપગ ભાંગ્યા કમસેકમ આ છોકરો તમારી નજર સામે તો છે.” ખેડુત ખડખડાટ હસવા લાગ્યો.

મિત્રો, જીવનમાં આવતા ચડાવ ઉતાર જીવન આપનારાએ ગોઠવેલા છે. જીવનમાં બનતી જુદી-જુદી ઘટના વખતે ‘ મારા નસિબ સારા છે’ કે ‘મારા નસિબ ખરાબ છે’ નો હર્ષ-શોક કરવાને બદલે કુદરતે નક્કી કરેલા પ્રવાહમાં જીવનનૌકાને મુકત રીતે વહેતી મુકવામાં આવે તો એની મજા કંઇક જુદી જ છે…

લેખક : શૈલેશ સગપરીયા

લેખ ગમ્યો હોય તો મિત્રો સાથે શેયર કરજો. 21 લાખ ગુજરાતીઓને ગમ્યું ગુજ્જુરોક્સનું ફેસબુક પેઈજ,તમે પણ લાઈક કરી જોડાઓ. ➡
Disclaimer: The views and opinions expressed in article/website are those of the authors and do not necessarily reflect the official policy or position of GujjuRocks. Any content provided by our bloggers or authors are of their opinion, and are not intended to malign any religion, ethic group, club, organization, company, individual or anyone or anything.

LEAVE A REPLY

Please enter your comment!
Please enter your name here